Trota [bida mai t’apo arresa]

Cun pinna ses in mesu de sa lota

chirchende de faeddos giustu pesu

Mancari custa bida est una tro… ta

Poeta, bidu mai t’apo arresu

E andas tando tue, comente trota,

non che sos pisches chi falant a mare

e sa carrera tua non t’est ignota

ca Riu ’e monte tue depes artziare

Su nùmene no ischis de su Riu

no ischis mancu in ue est sa fonte

ma bramas tenes d’unu nou criu

chi pinnicat in monte s’orizonte

Cun alentu de un’ampanadore

de mill’ideas galanas e fegundas

cumintzas cust’artziada, iscaladore

in abba fritta, durche e sena undas

Ses trazadore, che su riu mudu

abba basende•ti contracurrente

a su bisòngiu malu e limbudu

su coro furas a totu sa gente

Amaliadore ’e bentu, dissidente

Semper garbosu e de ètica bona

Ti credes gùtia, ma ses afluente

Su verbu tuo ponet ganabona

Mannu de istile e mannu de umilesa

Mancari sàbiu, ti ghetas a macu

E non t’ammentas tua manna bellesa:

non tenes meres, de nemos teracu

Mai timas fallimentu ne errore

fintzas si totu est unu pista-pista

A modde non s’intendet su suore

Cun pasu e àsiu non b’est sa conchista

Inoghe abarro, non ses(e) a sa sola

Istracu eh, ma a curtzu est sa chima

in pare s’ora curret, bola-bola

Bides chi semus prus artos de prima?

Appo’: in badde est oscurighende

A palas lughe ’e sole de su monte

Ma tue, sulenu, su die ses sighende

E istas inedda semper dae Caronte

A bortas tristu, ma semper abbistu

non ti frimare e bae! Faghe•ti onore!

Su pische l’at seberadu puru Cristu

ca dignu de sa paghe e de s’amore

Ses arribadu, nara-nara, in pitu

de sos tuos pensos deo fatzo impreu

pariat prus tardu e imbetzes est galu chito

pro dare cun sos versos su recreu

Pische poeta, como deo ti lasso

Bènni(d)a so pro cumpartzire s’afannia

Falare a bassu depo, ca so sassu

Tue inoghe lassa ovos(o) ebbia

E beru est chi ses indifesu

ma at a bènnere sa tua genia

Poeta, bidu mai t’apo arresu

in mare iseto sa tua poesia